Við fyrirspurn Handkastsins til HSÍ varðandi þátttöku tilkynningar félaga fyrir Íslandsmótið á næstu leiktíð vakti athygli að lið Harðar frá Ísafirði sem sent hefur lið til keppni í meistaraflokki karla undanfarin ár hefur ekki skráð lið til leiks fyrir næstu leiktíð.

Hörður lék undir stjórn portúgalska þjálfarans, Pedro Nunes á síðustu leiktíð í Grill66-deildinni og endaði í 5.sæti deildarinnar með 24 stig.

Liðið vann Gróttu í undanúrslitum umspilsins um laust sæti í Olís-deildinni 2-0 en tapaði síðan einvígi sínu gegn Stjörnunni 3-0 í úrslitunum um sæti í Olís-deildinni.

Eins og staðan er í dag er ljóst að Hörður mun ekki leika í Grill66-deildinni á næstu leiktíð.

Hörður lék í Olís-deild karla tímabilið 2022/2023 undir stjórn Spánverjans Carlos Martin Santos. Þar endaði liðið á botni deildarinnar með tvö stig eftir að hafa gert tvö jafntefli.