Línumaðurinn, Loftur Ásmundsson hefur gengið í raðir Stjörnunnar frá Val. Stjarnan kynnti þessi félagaskipti á samfélagsmiðlum sínum í dag.

Loftur sem er uppalinn í HK hefur leikið með yngri flokkum Vals og Val 2 í Grill66-deildinni síðustu tímabil. Loftur sem er fæddur árið 2002 skoraði 13 mörk í 14 leikjum fyrir Valur B í Grill66-deildinni á síðustu leiktíð. 

,,Loftur er ungur og efnilegur leikmaður sem gefur ekki tommu eftir. Hann mun auka breiddina okkar á línunni sem og í varnarleiknum. Það er alltaf gaman að vinna með ungum og efnilegum leikmönnum og það verður spennandi að sjá Loft fá tækifæri í Olís-deildinni í vetur,” sagði Hrannar Guðmundsson þjálfari Stjörnunnar.

Þetta er annað sumarið í röð sem Stjarnan semur við línumann frá Val en í fyrra kom Jóel Bernburg frá Val.

Loftur er annar íslenski leikmaðurinn fæddur árið 2002 sem Stjarnan fær til sín því áður hafði Stjarnan fengið örvhenta hornamanninn, Gauta Gunnarsson frá ÍBV.