Hilmar Guðlaugsson einn af tveimur þjálfurum U17 ára kvennalandsliðs Íslands var að vonum sár og svekktur eftir tap stelpnanna gegn Hollandi í 2. umferð riðlakeppni EM sem fram fer í Svartfjallalandi. Fjögurra marka tap 29-25 staðreynd

,,Þetta gekk ekki í dag. Við byrjuðum þetta ágætlega og það var kraftur í okkur í byrjun en við erum að fá alltof mörg mörk á okkur í fyrri hálfleik og þar af leiðandi ekki að fá mikið af hraðarupphlaup. Að sama skapi gekk sóknarleikurinn allt í lagi og við skorum 16 mörk en byrjunin á seinni hálfleiknum var alveg hræðileg," sagði Hilmar í samtali við Handkastið en staðan var jöfn í hálfleik 16-16.

,,Við skorum bara þrjú mörk á fyrstu 20 mínútunum í seinni og eru komin í erfiða stöðu sjö mörkum undir en við endum leikinn ágætlega. Við förum í 5-1 og náum að minnka þetta aðeins niður sem var mikilvægt að enda leikinn vel."

Hilmar sagði að hollenska liðið hafi spilað aggresíft gegn liðinu í dag og íslenska liðið hafi lent í vandræðum.

,,Við hörfum undan og náum litlu floti á boltann. Við erum með alltof marga tapaða bolta, í kringum 12-14 tapaðir boltar. Við eigum mikið inni sóknarlega þrátt fyrir að hafa skorað 25 mörk."

,,Danijela var frábær í markinu með 17 varða og Laufey var frábær með 11 mörk. Aðrar eiga mikið inni. Núna tökum við frídag á morgun og síðan þurfum við að undirbúa okkur vel gegn Sviss. Við þurfum að ná í góð úrslit þar til að eiga möguleika að fara áfram en það verður virkilega erfiður leikur," sagði Hilmar að lokum en leikur Íslands gegn Sviss fer fram á laugardaginn klukkan 15:00.