Strákarnir í U19 ára landsliði karla léku fyrri leik sinn í milliriðli á HM í Egyptalandi í dag er þeir mættu Serbum í nánast hreinum úrslitaleik um sæti í 8 liða úrslitum.

Strákunum gekk illa í byrjun leiks og misstu Serbana fljótlega 3 mörkum fram úr sér en náðu þó að jafna leikinn í 8-8.  Jafnt var nánast á öllum tölum í 13-13 en þá náðu Serbarnir að sigla fram úr og leiddu með 3 mörkum í hálfleik, 14-17.

Síðari hálfleikur byrjaði líkt og sá fyrri endaði og náðu Serbar mest 4 marka forystu 21-25. Þá fóru Íslendingar að saxa á forskot Serba og náðu að minnka það niður í eitt mark 28-29. Íslendingar fengu tækifæri til þess að jafna leikinn en tókst ekki að nýta lokasóknina og því var eins marks sigur Serba staðreynd.

Þessi úrslit þýða því að Serbar eru núna með 2 stig eins og Ísland en með betri innbirgðis viðureign. Serbar eiga eftir að mæta Sádi Arabíu og verður því miður að teljast ansi líklegt að þeir sigri þá nokkuð auðveldlega. Ísland mætir Spánverjum á morgun og verður að treysta á sigur þar og hagstæð úrslit annarstaðar til að eiga möguleika á að komast í 8 liða úrslit.

Markaskor Íslands:
Dagur Árni Heimisson 7 mörk, Stefán Magni Hjartarson 7, Ágúst Guðmundsson 4/2, Bessi Teitsson 4, Garðar Ingi Sindrason 3, Jens Bragi Bergþórsson 2, Dagur Leó Fannarsson 1.

Varin skot: Jens Sigurðarson 6, 24% Sigurjón Bragi Atlason 4/1, 29%.