Hrannar Guðmundsson staðfesti í samtali við Handkastið í gærkvöldi að óvíst er með þáttöku Gauta Gunnarssonar í fyrri Evrópuleiknum gegn Baia Mare í forkeppni Evrópudeildarinnar en leikurinn fer fram ytra laugardaginn eftir viku.

„Þetta lítur ekki vel út með Gauta, það var rifið aftan í hendina á honum undir lok leiksins gegn Fram og við verðum að taka stöðuna á honum á næstu dögum" sagði Hrannar en Gauti meiddist undir lok leiks er Dánjal Ragnarsson braut harkalega á Gauta sem fékk vítakast í kjölfarið og Dánjal fékk tveggja mínútna brottvísun.

Stjarnan heldur til Rúmeníu á þriðjudagskvöld og verður fróðlegt að sjá hvort Gauti verður búinn að jafna sig fyrir þann tíma.

Starri Friðriksson var ekki í leikmannahópi Stjörnunnar í sigri liðsins á Fram í Meistarakeppni HSÍ í gærkvöldi. Starri er annar af örvhentum hornamönnum Stjörnuliðsins ásamt Gauta.