Það styttist og styttist í komandi tímabil í Olís-deildum karla og kvenna en Olís-deild karla hefst miðvikudaginn 3. september á meðan Olís-deild kvenna hefst laugardaginn 6. september.

Handkastið heldur áfram að hita upp fyrir Olís-deildirnar og hefur sent sömu sex spurningarnar á alla þjálfara deildarinnar í karla og kvenna flokki.

Nú er komið að því að sjá hvað þjálfari ÍR í Olís-deild karla Bjarni Fritzson hafði segja.

Ertu ánægð/ur með hvernig undirbúningstímabilið hefur gengið?

Já mjög. Við læstum strákana í Gym-inu með Bjarka styrktarþjálfara og náðum að vinna vel í líkamlega þættinum í sumar, sem var mjög mikilvægt fyrir okkar unga leikmannahóp. Við höfum líka unnið markvisst í að byggja ofan á leik okkar og ég er nokkuð ánægður með útkomuna en það á auðvitað bara eftir að koma í ljós þegar deildin byrjar.

Hvernig metur þú þær mannabreytingar sem hafa orðið á liðinu í sumar?

Nýju strákarnir hafa verið að koma frábærlega inn í hópinn og ég er mjög ánægður með uppsetninguna á leikmannahópnum. Róbert hefur líka komið með sterka innkomu inn í þjálfarateymið, sem á eftir að hjálpa okkur mikið.

Hverjar telur þú vera helstu áskoranir þínar og liðsins í vetur?

Að halda fókus á hvert verkefni fyrir sig og láta utanaðkomandi og óstjórnalega þætti ekki hafa áhrif á okkur.

Hverjar eru væntingar þínar til tímabilsins?

Að við náum að byggja ofan á tímbilið í fyrra og vakna alla morgna með það hugarfar að reyna að verða betri en við vorum í gær.

Ef þú mættir velja þér einn leikmann úr öðru liði í deildinni til að fá í þitt lið - Hver væri það og
afhverju?

Það eru nokkrir uppaldir ÍR-ingar að spila í öðrum liðum í deildinni og það væri einstaklega gaman að fá þá aftur heim í Skógarselið til að taka þátt í þessu ævintýri með okkur. Já og Hafþór líka, hann á stóran þátt í að hafa mótað næstu kynslóð og þeir vilja ólmir fá hann aftur tilbaka.

Hvaða lið telur þú að verði deildarmeistari í vetur?

Er það ekki bara liðið sem fær flestu stigin.