Snorri Steinn Guðjónsson getur ekki farið með allt sitt þjálfarateymi í næsta landsliðsverkefni íslenska landsliðsins í lok október til Þýskalands.

Vegna niðurskurðar hjá HSÍ þarf Snorri Steinn að fækka um tvo starfsmenn í starfsteymi sínu.

Óskar Bjarni Óskarsson var í sumar ráðinn aðstoðarþjálfari íslenska kvennalandsliðsins. Óskar Bjarni hefur verið í þjálfarateymi Snorra Steins frá því að Snorri tók við liðinu.

Snorri segir að það hafi engin áhrif á þjálfarateymi karla landsliðið þó Óskar Bjarni sé kominn inn í þjálfarateymi kvennalandsliðsins.

,,Það hefur ekkert áhrif á teymið annað en einhver niðurskurður. Ég þurfti að fækka um tvo í teyminu í þessu verkefni en ég sé til með janúar. Ég geri ráð fyrir að ég fari með fullt teymi á EM,” sagði Snorri Steinn í viðtali við Handkastið í síðustu viku eftir að hann valdi 17 manna leikmannahóp fyrir komandi verkefni í Þýskalandi í lok október.

Þar leikur Ísland tvívegis gegn þýska landsliðinu.