Eftir 20 daga hlé heldur Meistaradeild Evrópu kvenna áfram um helgina þegar að 5. umferðin fer fram.

Baráttan í báðum riðlum harðnar eftir því sem umferðunum fjölgar og spennan mikil um hvaða lið komast í útsláttarkeppnina.

Györ og Metz verja toppsætin

Í A-riðli halda tvö af stóru liðunum áfram að setja tóninn.
Ríkjandi meistarar Györi eiga stutt ferðalag fyrir höndum í útileik þegar þær mæta DVSC Schaeffler í ungverskum nágrannaslag á laugardaginn. Györ hefur unnið alla fjóra leiki sína hingað til og er með besta sóknarlið keppninnar en þær hafa skorað 143 mörk – rúm 35 mörk að meðaltali í leik.
Dione Housheer er markahæst með 24 mörk, en Debrecen vonast til að nýta heimavöllinn og gera leikinn jafnari en fyrri viðureignir liðanna.

Franska stórliðið Metz heldur til Noregs og mætir Storhamar, sem hefur sýnt ótrúlega sterka vörn í vetur. Storhamar hefur aðeins fengið á sig 95 mörk í fjórum leikjum og markvörðurinn Eli Marie Raasok hefur varið 39% skota. Metz er hins vegar með næstbesta sóknarlið riðilsins og ætlar sér að halda fullkomnu gengi sínu áfram.

Í Rúmeníu fer fram áhugaverður leikur þegar Gloria Bistrita tekur á móti Esbjerg. Liðin eru jöfn að stigum, en Esbjerg hefur verið á mikilli sigurbraut undir stjórn Tomas Axnér. Henny Reistad og Tabea Schmid hafa báðar verið í miklu stuði – Reistad er markahæst allra í Meistaradeildinni með 28 mörk.

Að lokum mætast Borussia Dortmund og Buducnost í baráttu botnliðanna á sunnudag. Buducnost er enn án stiga og hefur átt í miklum vandræðum með sóknarleik sinn, á meðan Dortmund hefur fengið flest mörk á sig allra liða.

Brest og Ikast mætast í stórleik í Danmörku

Í B-riðli verður mikið í húfi þegar toppliðin tvö, Ikast og Brest, mætast í Danmörku á sunnudaginn.
Brest er eina liðið í riðlinum sem hefur unnið alla leiki sína til þessa og skorað 132 mörk í fjórum leikjum. Annika Lott hefur verið frábær fyrir Frakkana, en Ikast nýtur sterkrar markvörslu hjá Amalie Milling, sem hefur varið 49 skot sem er tæplega 40% markvarsla. Þjálfarinn Søren Hansen segir leikinn „mikla mælistiku fyrir hvar við stöndum gagnvart besta liðinu í riðlinum“.

Á laugardaginn fer "leikur vikunnar" fram í Króatíu þar sem Podravka tekur á móti FTC. Podravka tapaði sínum fyrsta leik í síðustu umferð gegn CSM Bucuresti, en Katarina Pandža heldur áfram að vera í miklu formi en hún hefur skorað 27 mörk fyrir króatíska liðið. FTC hefur hins vegar unnið tvo leiki í röð og ætlar sér að bæta þeim þriðja við.

Í Ljubljana tekur Krim á móti CSM Bucuresti, sem hafa verið óstöðugar en eru þó með hættulega sókn undir forystu Elizabeth Omoregie, sem hefur skorað 27 mörk.
Krim er eitt þriggja liða án sigurs, en þjálfarinn Anne With Johansen er bjartsýn: „Við erum að nálgast það að allt smelli saman – það er spurning hvenær við náum fyrsta sigrinum.“

Á sama tíma verður norrænn slagur þegar Odense fær Sola HK í heimsókn. Odense tapaði í fyrsta sinn í síðustu umferð gegn Brest, en er áfram með eitt af bestu sóknar liðum Meistaradeildarinnar en þær hafa skorað 131 mark til þessa. Sola hefur hins vegar tapað öllum fjórum leikjum sínum en vonast til að markvörðurinn Rikke Marie Granlund haldi uppteknum hætti frá fyrri leikjum og nái að hjálpa liðinu að ná í sín fyrstu stig.

Leikjadagskrá 5. umferðar

A-riðill
Gloria - Esbjerg | Laugardagur 25.október kl 14.00
DVSC - Györ | Laugardagur 25.október kl 16.00
Storhamar - Metz | Laugardagur 25.október kl 16.00
Dortmund - Buducnost | Sunnudagur 26.október kl 15.00

B-riðill
Podravka - FTC | Laugardagur 25.október kl 14.00
Krim - CSM Búkaresti | Laugardagur 25.október kl 16.00
Odense - Sola | Sunnudagur 26.október kl 13.00
Ikast - Brest | Sunnudagur 26.október kl 15.00