Norska handboltastjarnan Nora Mørk hefur nú fengið allt á hreint og staðfest að hún geti tekið þátt á heimsmeistaramóti kvenna sem hefst í lok nóvember að því er kemur fram hjá tímaritinu Aftonbladet. 

Mörk greindi frá því fyrir nokkrum vikum að þátttaka hennar væri í lausu lofti vegna vandræða með vegabréf dóttur sinnar, Tyru, sem er sex mánaða. Nora á barnið með sænska landsliðsmanninum, Jerry Tollbring leikmanni Ribe-Esbjerg í dönsku úrvalsdeildinni.

Mörk sagðist ekki vilja ferðast án dóttur sinnar og málið snerist um að henni hafði ekki tekist að útbúa upprunalega fæðingarvottorðið, vegna flókins þjóðerni­- og búsetumáls þar sem móðirin væri norsk, faðirinn sænskur og stúlkan fæddist í Danmörku þar sem Nora leikur með Team Esbjerg.

Í dag kom hins vegar skýrt svar: sambýlismaður hennar, Jerry Tollbring, tilkynnti að vegabréfið hafi verið útbúið og Tyra geti ferðast með móður sinni. „Við sóttum vegabréfið í dag – svo nú er það klárt,“ sagði Tollbring í samtali við Sportbladet. 

Með þessu er Mørk klár til að taka þátt á EM með norska kvennalandsliðinu ef hún verður valin í landsliðið sem verður að teljast nokkuð öruggt.

Jerry Tollbring segir þó að hann muni ekki sjálfur fylgja móður og dóttur alla leið, því hann hafi fullt starf með liði sínu í Danmörku. „Líklega fylgir móðir Noru með, og Tyra fer heim til mín milli leikja,“ sagði hann.