Sænski handknattleiksmaðurinn Viktor Rhodin er látinn aðeins 31 árs að aldri eftir að hafa háð harða rimmu við krabbamein.

Rhodin lék með Sävehof, Önnered og svo Aranäs í Svíþjóð. Hann var leikmaður Önnered þegar hann greindist fyrst með krabbamein í heila fyrir rúmum sex árum.

Rhodin gekkst svo undir aðgerð vegna krabbameinsins og náði heilsu á nýjan leik og safnaði þreki og þrótti til að snúa aftur á handboltavöllinn. Hann æfði með hjálm á höfðinu en var bannað að nota hann í leikjum og spilaði því án hans.

Vorið 2024 kom í ljós að krabbameinið hafði snúið aftur og hrakaði heilsu hans hratt. Hann lést svo á þrettándanum þann 6. janúar síðastliðinn.