Evrópska handknattleikssambandið hefur gefið út leiktímana í milliriðlum Evrópumótsins en milliriðlarnir fara af stað á morgun. Fyrsti leikur Íslands í milliriðlinum verður leikinn í Malmö næstkomandi föstudag klukkan 14:30.

Það er ekki hægt að segja annað en að Íslendingar hafi dregið stutta stráið hvað varðar leiktímana því þrír af fjórum leikjum Íslands verða leiknir klukkan 14:30 á íslenskum tíma, allt á virkum dögum.

Eini leikur Íslands sem ekki hefst klukkan 14:30 verður á sunnudaginn þegar íslenska liðið mætir heimamönnum í Svíþjóð klukkan 17:00 á íslenskum tíma.

Leikir Íslands í milliriðli

Ísland-Króatía - Föstudagurinn 23. janúar klukkan 14:30

Ísland-Svíþjóð - Sunnudagurinn 25. janúar klukkan 17:00

Ísland-Sviss - Þriðjudagurinn 27. janúar klukkan 14:30

Ísland-Slóvenía - Miðvikudagurinn 28. janúar klukkan 14:30