Eftir jafntefli gegn Sviss hjá Strákunum okkar fyrr í dag 38-38 var ljóst að íslenska liðið þurfti að treysta á hagstæð úrslit úr öðrum leikjum í milliriðlinum til að eiga enn möguleika á sæti í undanúrslitum Evrópumótsins.

Þau hagstæðu úrslit komu í leik Svíþjóðar og Ungverja í lokaleik kvöldsins er liðin gerðu jafntefli 32-32 eftir að Ungverjar höfðu verið yfir 16-14 í hálfleik.

Loka mínútur leiksins voru æsispennandi. Ungverjar virtust vera í lokasókn leiksins en fengu dæmdan á sig ruðning þegar nokkrar sekúndur voru eftir af leiknum, manni færri og með engan í markinu. Andreas Palicka markvörður Svía tók skot yfir allan völlinn... sem endaði í hliðarnetinu að utanverðu.

Úrslitin þýða það að nú eru Ísland og Króatar í bílstjórasætinu fyrir lokaumferðina sem fer fram á morgun. Ísland mætir Slóveníu í lokaleik sínum í milliriðlinum og þurfa einungis að treysta á sjálfan sig og vinna þann leik til að tryggja sæti í undanúrslitum Evrópumótsins sem fara fram í Herning í Danmörku á föstudaginn.

Hér að neðan má sjá skot Palicka sem geigaði og hélt íslenska draumnum á lífi... í bili.

View this post on Instagram

A post shared by EHF EURO (@ehfeuro)