Snorri Steinn Guðjónsson var mættur í viðtal við Eddu Sif Pálsdóttur á RÚV beint eftir jafntefli liðsins gegn Sviss í Malmö í dag þar sem hann var spurður spjörunum úr.

Edda Sif spurði hann fyrst að því hvernig íslenska liðið geti átt svona frábæran leik gegn Svíþjóð en boðið síðan upp á frammistöðu líkt og í dag?

,,Ég hef ekki svar við því.”

En hvað veldur?

,,Auðvitað hef ég það ekki svona beint eftir leik en það segir sig sjálft að við vorum skrefinu á eftir þeim varnarlega allan leikinn í dag. Það kemur smá kafli um miðbik seinni hálfleiks sem glittir í þetta en þá erum við á sama tíma klaufar og óðagot á okkur og tapaðir boltar og skot í tómt markið og hlutir sem falla ekki með okkur.”

En er hægt að skrifa þetta á stress, alla þessa töpuðu bolta?

,,Það getur vel verið. Menn vilja þetta mjög mikið og það er mikið í húfi. Hraðarupphlaupin gengu samt vel og við vorum að skora mikið af mörkum og það var ekkert óeðlilegt að við vildum gera það en við erum með of marga tapaða bolta í þessum leik.”

Snorri Steinn efast um að þetta stig dugi liðinu til að komast í undanúrslit mótsins.

,,Það er líklegt að þetta stig dugi ekki til. Við þurftum að vinna báða leikina en við verðum að bíða og sjá en ég á von á því að þetta dugi ekki.”