Vinstri hornamaðurinn, Dagur Gautason gekk í raðir uppeldisfélags síns, KA nú um áramótin eftir dvöl erlendis síðustu ár hjá Arendal í Noregi og Montpellier í Frakklandi.

KA leikur sinn fyrsta leik á árinu gegn ÍR í Skógarselinu í kvöld í 16.umferð Olís-deildar karla. Dagur Gautason verður ekki með KA í leiknum en hann sneri sig illa á ökkla á æfingu liðsins á mánudaginn. Þetta staðfesti Dagur í samtali við Handkastið. Endurkoma Dags seinkar því með KA-liðinu en óvíst er hversu lengi Dagur verður frá.

Þrír leikir fara fram í Olís-deild karla í kvöld. ÍBV og Selfoss eigast við í Vestmannaeyjum klukkan 18:00 og HK mætir FH á sama tíma. Leikur ÍR og KA hefst síðan klukkan 18:30.

Á morgun lýkur síðan umferðinni með þremur leikjum.