Berta Rut Harðardóttur hefur gert samning við Handknattleiksdeild Hauka um að leika með félaginu frá og með næsta tímabili. Þetta tilkynntu Haukar rétt í þessu.

Berta Rut sem er uppalin Haukakona snýr því aftur heim á Ásvelli eftir 4 ár erlendis þar sem hún hefur leikið með Holstebro Håndbold í Danmörku og Kristianstad HK í Svíþjóð.

Haukar segja það mikið ánægjuefni að fá Bertu Rut heim en hún mun án efa styrkja lið Hauka til muna og auka breiddina í hægri skyttu stöðunni. Berta sem verður 26 ára í sumar lék sinn fyrsta leik fyrir Hauka 16 ára gömul og var hún ein af lykilmönnum Haukaliðsins áður en hún lagði land undir fót.

Koma Bertu heim í Hauka hjálpar Haukum í þeim markmiðum að vera í baráttunni um alla þá titla sem í boði eru og hlökkum við til að sjá hana á ný í Haukatreyjunni á parketinu á Ásvöllum á næsta tímabili.

Við undirskriftina hafði Berta Rut þetta að segja: „Það er ótrúlega gaman að vera komin aftur heim í Hauka. Ég hlakka mikið til að verða hluti af þessum frábæra hópi, leggja mitt af mörkum fyrir liðið og halda áfram að bæta mig sem leikmann.“