Elmar Erlingsson leikmaður Nordhorn-Lingen í þýsku B-deildinni verður frá keppni í þrjár til sex vikur vegna axlarmeiðsla.

Það er handbolti.is sem greindi fyrst frá hér á landi.

Elmar fékk högg á aðra öxlina í leik Nordhorn gegn Potsdam á föstudaginn í síðustu viku. Hann fór í myndatöku vegna meiðslanna á mánudaginn og nú hefur komið niðurstaða. Segulómskoðun sem Elmar fór í leiddi í ljós að Elmar slapp við brot en hlaut fyrsta stigs mar á axlarliðnum. Liðböndin eru ósködduð en líklegt þykir að töluverð innvortis blæðing hafi orðið við höggið.

Elmar sem er á sínu öðru tímabili með Nordhorn framlengdi samningi sínum við félagið fyrr á þessu ári og er með samning við félagið út næsta tímabil.

Tíu umferðir eru eftir af þýsku B-deildinni og ljóst að Elmar missir að minnsta kosti af næstu þremur leikjum liðsins vegna meiðslanna.