Silja Katrín Gunnarsdóttir leikmaður Fram í Olís-deild kvenna og Fram 2 í Grill66-deild kvenna hefur framlengt samningi sínum við Fram. Þetta tilkynnti félagið á samfélagsmiðli sínum í dag.

,,Það gleður okkur að tilkynna að hún Silja Katrín Gunnarsdóttir, ein af okkar eigin hefur framlengt samning sinn við Fram," segir í tilkynningunni.

,,Silja Katrín er örfhent og spilar í hægra horni og er bráðefnileg og hefur verið í yngri landsliðunum Íslands. Silja hefur verið að koma til baka eftir erfið hnémeiðsli og hefur stimplað sig vel inn á æfingar og í leikjum. Við í Fram hlökkum til að sjá hana vaxa og dafna á næstu árum og fögnum því að hafa hana áfram í okkar herbúðum, enda passar hún vel inn í okkar módel sem byggir á því að gefa okkar uppöldu leikmönnum pláss til að ná árangri á stærsta sviðinu," segir enn fremur í tilkynningunni.

Silja Katrín hefur verið viðloðandi yngri landslið Íslands undanfarin ár en hún er fædd árið 2008. Silja Katrín gerir tveggja ára samning við Fram sem gildir til ársins 2028.