Ágúst Þór Jóhannsson þjálfari deildarmeistara Vals var að vonum ánægður með fjögurra marka sigur Vals gegn HK í seinni leik liðanna í 8-liða úrslitunum. Með sigrinum tryggði Valur sér sæti í undanúrslitum um Íslandsmeistaratitlinn og mætir þar KA sem sló út ÍBV fyrr í dag.

,,Þetta var hörkuleikur og járn í járn allan tímann. HK spilaði virkilega vel í þessu einvígi og voru mjög erfiðir. Mér fannst þegar líða fór á leikinn vera meira á tanknum hjá okkur og við náðum að rúlla á aðeins fleiri mönnum. Varnarleikurinn var góður og Björgvin í markinu einnig," sagði Gústi Jó. meðal annars í viðtali við Handkastið eftir leik.

VALUR SENDI HK Í SUMARFRÍ

Mikið var rætt og ritað um dómgæsluna í fyrri leik liðanna sem Valur vann eftir framlengdan leik. Þar fannst mönnum hallað verulega á HK-inga undir lok leiks sem hjálpaði Val að komast til baka og tryggja framlengingu.

,,Eftir að hafa skoðað dómgæsluna í fyrri leiknum, þá er voða auðvelt að horfa á þetta með HK augum. Það er fullt af atriðum í þeim leik eins og gengur og gerist. Dómgæslan í kvöld var toppklassi. Þetta var góður handbolti og góð auglýsing fyrir handboltann," sagði Ágúst meðal annars.

Viðtalið í heild sinni má sjá hér að neðan.