Handkastið greindi frá því á dögunum að Tumi Steinn Rúnarsson væri mögulega á heimleið eftir dvöl erlendis bæði í Þýskalandi og í Austurríki undanfarin ár. Tumi Steinn var þá orðaður mögulega við KA en í nýjasta þætti Handkastsins sagði Kristinn Björgúlfsson frá leigubílasögu sem hann hafði heyrt.

,,Við höfum rætt um það áður að Tumi Steinn væri mögulega á leið norður. Ég fékk bara skeytasendingar og hláturgas frá Akureyri þegar ég sagði að hann væri á leið þangað,” sagði Stymmi klippari í þættinum áður en Kristinn sagði frá leigubílasögunni.

,,Ég er með leigubílasögu varðandi það. Það að Tumi Steinn sé á leiðinni í KA er víst kjaftæði. Hann mun fara í Val og Dagur Árni Heimisson fer heim í KA. Maður hafði heyrt þær sögur, hvað sem er svosem til í því að Dagur Árni hafi næstum því verið farinn heim um áramótin. Hann hefur átt smá erfitt uppdráttar í Val, bæði meiðslalega séð og kannski ekki spilað eins og hann eða Valur vildi. Leigubílasagan er góð,” sagði Kiddi Bjé.

Dagur Árni var keyptur til Vals frá KA í sumar á metfé en hann var einn eftirsóttasti leikmaður landsins í sumar þar sem meðal annars Afturelding reyndi að kaupa hann frá KA. Hann hefur hinsvegar verið að glíma við meiðsli meiri hluta tímabilsins og ekkert leikið með Val eftir áramót.