Við heyrðum aðeins í Signý Pálu Pálsdóttir markmanni Fjölnis í Grill66-deildinni og grennsluðumst aðeins fyrir það hvort eitthvað væri til í þeim orðrómi að hún væri að hætta í handbolta. Það stóð ekki á svörum hjá Signý Pálu.

,,Ég er mjög sátt við tímann minn í handboltanum. Ég hef æft handbolta frá því að ég var 8 ára með nokkrum hléum og hef síðan þá eignast margar góðar vinkonur og á margar skemmtilegar minningar frá þessum tíma í sportinu, bæði í Val, Gróttu, Víkingi, u-19 landsliðinu og nú síðast í Fjölni. Það eru kaflaskil hjá mér þar sem ég er að fara til London í meistaranám þannig að ég tel þetta góðan tímapunkt til að setja skóna endanlega á hilluna."

Handkastið óskar Signý Pálu góðs gengis í London en vonar að hún muni snúa aftur milli stanganna þegar hún snýr aftur til Íslands eftir námið.