Stefáni Árnasyni hefur verið sagt upp störfum sem þjálfara Aftureldingar eftir eins árs starf sem aðalþjálfari liðsins. Þetta herma áreiðanlegar heimildir Handkastsins en leikmönnum Aftureldingar voru tilkynnt tíðindin í kvöld.

Stefán hafði áður verið aðstoðarþjálfari Gunnars Magnússonar hjá Aftureldingu í þrjú ár og stýrt yngri flokkum hjá félaginu. Stefán var yfirþjálfari Aftureldingar á þessu tímabili samhliða því að stýra meistaraflokki félagsins.

Afturelding féll úr leik í úrslitakeppni Íslandsmótsins í síðustu viku eftir tap gegn Haukum í 8-liða úrslitum í oddaleik á Ásvöllum. Liðið endaði í 6.sæti Olís-deildarinnar í vetur eftir frábæra byrjun á tímabilinu þar sem Afturelding vann fimm fyrstu leiki sína á tímabilinu.

Gengi liðsins eftir áramót var hinsvegar brösugt þar sem liðið vann einungis einn leik í Olís-deildinni af þeim sjö leikjum sem liðið spilaði og þá tapaði liðið í 8-liða úrslitum gegn Haukum 2-1 eins og fyrr segir.