Slóvenía vann Ungverja í fyrsta leik dagsins 35-32 og eru Slóvenar nú komnir með 4 stig í milliriðli 2. Blaz Janc dró vagninn fyrir Slóvena og skoraði 10 mörk í dag. Með tapinu eru möguleikar Ungverja hinsvegar orðnir að engu en þeir eru einungis með 1 stig eftir jafntefli við Sviss.

Í öðrum leik dagsins vann íslenska liðið stórbrotinn 8 marka sigur á Svíum fyrir framan troðfulla höll í Malmö. Íslenska liðið var komið með bakið upp við vegg eftir tap á móti Króatíu en svaraði svo sannarlega fyrir sig með sigri á Svíum í dag.

Í síðasta leik dagsins mættust svo Sviss og Króatía en Dagur Sigurðsson og lærisveinar hans héldu möguleikum sínum í mótinu opnum með sigrinum á Íslandi um daginn. Króatarnir voru skrefinu á undan allan tímann í dag og unnu loks 4 marka sigur.

4 lið eru með 4 stig í riðlinum, Ísland, Svíþjóð, Króatía og Slóvenía og eru sætin tvö í undanúrslitum því hvergi örugg fyrir síðustu tvær umferðirnar. Slóvenía og Króatía mætast svo innbyrðis í næstu umferð.

Úrslit dagsins:
Slóvenía - Ungverjaland 35-32
Ísland - Svíþjóð 35-27
Sviss - Króatía 24-28