Grænlenska karla og kvennalandsliðið kemur til Íslands í æfingaferð í október. Þetta staðfesti Jón Gunnlaugur Viggósson íþróttastjóri HSÍ við Handkastið.

Grænlenska handknattleikssambandið gaf út leikmannahópa kvennalandsliðsins sem kemur til Íslands dagana 13. - 19. október en Jón Gunnlaugur segir að Grænlendingarnir séu að koma á eigin vegum.

Kvennalandsliðið leikur tvívegis gegn U20 ára landsliði Íslands en leikirnir fara fram dagana 16. og 18. október.

Kvennalandslið Grænlands mætti því íslenska á HM 2023 en þar hafði Ísland betur 37-14 en Grænland endaði í neðsta sæti á HM 2023 eftir tap gegn Íran 28-23 í lokaleik mótsins.

Karlalandslið Grænlands kemur síðan til Íslands dagana 27. október til 2. nóvember og leikur æfingalandsleiki gegn U20 ára karla landsliði Íslands dagana 30. október og 1. nóvember.