Meistaradeild Evrópu kvenna hófst á laugardag með fjórum leikjum, þar af þremur í B-riðli. Danska liðið Odense Håndbold, sem endaði í öðru sæti síðasta tímabils, varð eina liðið sem náði útisigri þegar það lagði FTC-Rail Cargo Hungaria í æsispennandi viðureign, 34:32.

Í Króatíu hafði HC Podravka betur gegn nýliðunum í Sola HK, á meðan franska stórliðið Brest Bretagne Handball sýndi styrk sinn og vann sannfærandi sigur á Krim OTP Group Mercator.

Riðill A

Gloria Bistrița (ROU) – Storhamar (NOR) 29:26 (15:12)
Markahæstar Asuka Fujita 8 mörk (Bistrița) og Veronika Mala 7 mörk (Storhamar)

Gloria Bistrița hóf sitt annað tímabil í Meistaradeildinni á besta hugsanlega hátt með sigri á Storhamar, rétt eins og í fyrra.
Tveir leikmenn rúmenska liðsins skoruðu helming marka liðsins, hin japanska Asuka Fujita skoraði 8 mörk og Danila So Delgado Pinto 7. Markvörðurinn Renata De Arruda átti stórleik, sérstaklega í fyrri hálfleiknum með 11 varin skot sem gerir 48% markvörslu. Þrátt fyrir að Storhamar hafi náð að jafna í 17:17 í síðari hálfleik tóku heimakonur aftur völdin og unnu sinn fyrsta CL-sigur síðan í janúar 2025.

Riðill B

FTC (HUN) – Odense Håndbold (DEN) 32:34 (16:18)
Markahæstar: Ingvild Bakkerud 7 mörk (Odense) Emily Vogel 8 mörk og Katrin Klujber 8 mörk (FTC)

Odense hafði betur í endurteknum slag við FTC, rétt eins og í undanúrslitum síðasta tímabils. Danska liðið hafði yfirhöndina megnið af leiknum en mikil spenna var undir lok leiksins. FTC jafnaði í 29:29 eftir rauða spjaldið á Nikita van der Vliet, en Bakkerud innsiglaði sigurinn á lokamínútunni. Markvörðurinn Althea Reinhardt varði 14 skot og Ingvild Bakkerud var atkvæðamest í sókninni með 7 mörk.

HC Podravka (CRO) – Sola HK (NOR) 31:26 (15:11)
Markahæstar: Kristiane Knutsen 6 mörk (Sola), Matea Pletikosic 13 mörk (Podravka)

Podravka reyndist of stór biti fyrir nýliðana í Sola HK. Matea Pletikosic skoraði 13 mörk, þar af 9 úr vítakasti, og varð markahæsti leikmaður dagsins. Norðmennirnir reyndu að saxa á forskotið í lokin, en Podravka stjórnaði leiknum. Þrátt fyrir nýafstaðna lyfjameðferð var Camilla Herrem mætt aftur inn á völlinn og skoraði 5 mörk í sínum fyrsta CL-leik með Sola.

Brest (FRA) – Krim (SLO) 32:20 (13:9)
Markahæstar: Ana Abina 4 mörk (Krim), Onacia Ondono 6 mörk, Annika Lott 6 mörk(Brest)

Brest vann stærsta sigur dagsins með sannfærandi 12 marka mun. Franska liðið byggði leik sinn á traustri vörn og fjölbreyttri sókn, þar sem bæði Onacia Ondono og Annika Lott skoruðu 6 mörk. Ana Gros, sem gekk til liðs við Brest í sumar bætti 3 mörkum við gegn sínu gamla liði. Brest sýndi að liðið ætlar sér stóra hluti í ár.