Handkastið gerði upp sigur Íslands á Ungverjalandi í lokaleik strákanna okkar í riðlakeppni Evrópumótsins gær. Ísland vann Ungverja með einu marki, 24-23 í ótrúlegum handboltaleik sem bauð upp á nánast allt sem handboltinn getur boðið uppá.

Það var því mikið að fara yfir í uppgjörsþættinum en Arnar Daði Arnarsson, Sérfræðingurinn fékk til sín þá Stefán Rafn Sigurmannsson og Tómas Þór Þórðarson og fóru þeir yfir nánast allt sem gerðist í leiknum og gott betur en það.

Rætt var meðal annars um spennustigið hjá íslenska liðinu í upphafi leiks sem kostaði liðið marga tapaða bolta og var Viktor Gísli Hallgrímsson bjargvættur í upphafi leiks en hann var að lokum valinn maður leiksins eftir frábæra frammistöðu sína allan leikinn.

,,Þetta var allt frekar þyngra en það sem við höfðum séð í fyrstu tveimur leikjunum. Við sáum það fyrstu mínúturnar, andrúmsloftið var þyngra og aðeins meira stress í mönnum. Við vorum að tapa mörgum boltum en þetta er allt frekar skiljanlegt. Við höfum verið í vandræðum með Ungverjanna í gegnum tíðina. En þetta endaði mjög vel,” sagði Stefán Rafn Sigurmannsson fyrrum atvinnu- og landsliðsmaður Íslands sem var gestur í uppgjörsþætti Handkastsins eftir sigurinn á Ungverjum.

,,Vonandi höfum við tekið þetta út núna, því þetta ungverska lið er langt í frá að vera frábært og við vorum í rauninni sjálfum okkur verstir. Við erum að fara tala um marga rosalega góða hluti í leiknum en það voru líka rosalega margir lélegir hlutir og við gerðum að mörgu leiti allt sem við gátum til að vinna ekki þennan leik. Sérstaklega í byrjun, við erum með fjóra tapaða bolta í byrjun leiks. Gísli Þorgeir sem átti eftir að eiga stórkostlega frammistöðu, ég hélt að hann væri að fara fá heilablóðfall í beinni. Hann tók verstu ákvarðanir sem ég hef séð hann spila og þá er ég að taka inn í myndina líka þegar hann var 17 ára í FH. En hann var fljótur að ná sér og átti stórkostlega frammistöðu,” sagði Tómas Þór meðal annars um slæma byrjun íslenska liðsins.