Franska úrvalsdeildin hefur tekið ákvörðun að eftir 42 ár þar sem franskir meistarar hafa verið krýndir eftir deildarkeppni verður úrslitakeppni eftir að deildarkeppninni lýkur frá og með tímabilinu 2026/2027.

Ákveðið hefur verið að átta efstu liðin eftir deildarkeppni í frönsku úrvalsdeildinni fari í úrslitakeppni. Fjögur efstu lið deildarinnar berjast um franska meistaratitilinn en undanúrslitin verða leikin heima og heiman. Í kjölfarið verður síðan hreinn úrslitaleikur á hlutlausum velli um franska titilinn.

Sæti fimm til átta leika um eitt laust sæti í Evrópukeppninni.

,,Þetta mun örugglega bæta mikilli spennu við lokakafla tímabilsins, sérstaklega þar sem einn leikur á hlutlausum velli mun ráða úrslitum," sagði danski handboltaspekingurinn, Rasmus Boysen á Facebook-síðu sinni en hann vakti athygli á þessari breytingu í gærkvöldi.

Einn íslenskur leikmaður leikur í frönsku úrvalsdeildinni í dag. Sveinn Jóhannsson leikur með Chambéry Savoie en liðið er um þessar mundir í 5.sæti deildarinnar.

PSG hefur unnið frönsku deildina ellefu tímabil í röð.