Jovan Kukobat sneri aftur á völlinn í sigri HK gegn Þór á heimavelli í 18.umferð Olís-deildar karla á föstudagskvöldið.

Um er að ræða fyrsta leik Kukobat á þessu tímabili en hann gekkst undir aðgerð á handlegg í sumar sem hefur haldið honum frá keppni. Kukobat kom við sögu undir lok leiks í lífsnauðsynlegum sigri HK gegn Þór og varði meðal annars vítakast frá Arnóri Þorra Þorsteinssyni á mikilvægum tímapunkti í leiknum.

HK vann leikinn að lokum með fimm mörkum 36-31 en með sigrinum fór HK upp í 8.sæti deildarinnar með 12 stig, stigi meira en Selfoss sem er í 9.sætinu. Þór er áfram í 11.sætinu með 9 stig, stigi á eftir Stjörnunni og með tveimur stigum meira en ÍR þegar fjórar umferðir eru eftir.

Jovan Kukobat gekk í raðir HK fyrir síðustu leiktíð frá Aftureldingu en hann hefur víða komið við á ferlinum en hann hefur meðal annars leikið með Víkingi, KA og Akureyri.

Samningur Kukobat við HK rennur út eftir tímabilið og óvíst hvað tekur við hjá þessum reynslu mikla markverði.