Talið er líklegt að Talant Dujshebaev þjálfari pólska stórliðsins Kielce taki við sem þjálfari franska landsliðsins og verður þetta kynnt á blaðamannafundi sem franska sambandið heldur í dag.

Er gert ráð fyrir að Talant taki við liðinu af Guillaume Gille sem hefur stýrt liðinu frá 2020 en Gille var áður aðstoðarlandsliðsþjálfari franska landsliðsins á árunum 2016-2020.

Þessi tíðindi eru talin afar óvænt þar sem franska sambandið hefur ávallt lagt það í vana sinn að vera með landsliðsþjálfara í 100% starfi en Talant Dujshebaev er á samning við Kielce og samkvæmt heimildum Handkastsins er gert ráð fyrir að hann verði áfram við stjórnvölinn í Póllandi.

Árangur franska landsliðsins á Evrópumótinu í janúar olli stjórnarmönnum franska sambandsins vonbrigðum en liðið komst ekki uppúr milliriðlum keppninnar en Frakkland endaði í 4.sæti milliriðilsins á eftir Danmörku, Þýskalandi og Portúgal.

Talant hefur stýrt Kielce frá árinu 2014 en hann var landsliðsþjálfari Ungverjalands á árunum 2014-2016 og þjálfari pólska landsliðsins 2016-2017. Nú er hinsvegar gert ráð fyrir að hann sé að taka við franska landsliðinu sem verður því hans þriðja landslið á þjálfaraferlinum.

Dujshebaev verður 58 ára í lok júní á þessu ári.