Undanúrslitin í Powerade-bikar kvenna fara fram á Ásvöllum í kvöld en KA/Þór mætir Val klukkan 20:15 í seinni leik kvöldsins. Haukar og Fram mætast klukkan 18:00 í fyrri viðureign undanúrslitanna.

Jónatan Magnússon þjálfari nýliða KA/Þórs í Olís-deild kvenna sendi skilaboð til stuðningsmanna sinna í gær þar sem hann hvetur Akureyringa búsetta á höfuðborgarsvæðinu að mæta og styðja við liðið gegn frábæru Valsliði. Jónatan segir verkefnið vera ærið en liðið mæti hinsvegar með kassann úti, fullar af baráttuanda og með trú á verkefnið.

Skilaboð Jónatans til stuðningsmanna KA/Þórs má sjá hér að neðan:

FINAL FOUR – VIÐ ERUM KLÁR

Gleðilega bikarveislu kæru stuðningsmenn .

Markmiðið okkar frá fyrsta degi var skýrt að komast í þessa helgi – og nú erum við á leiðinni !

Stelpurnar hafa lagt gríðarlega mikið á sig, æft af krafti, barist saman og unnið svo sannarlega fyrir því að vera hér í skemmtilegustu helgi tímabilsins.

Verkefnið framundan er ærið. Andstæðingarnir eru Íslands- og Evrópumeistarar. Valslið með frábæran hóp og öflugt þjálfarateymi. En við mætum með kassann úti, fullar af baráttuanda og trú á verkefnið.

Við vitum að allt er hægt þegar fólk hefur trú – og með geggjuðum stuðningi frá ykkur er ALLT mögulegt!

Við viljum sjá Ásvelli fyllast af KA/Þór litum, stemningu og látum.

Styðjum okkar lið og gerum næstu daga eftirminnilega.

Akureyringar búsettir á höfuðborgarsvæðinu við treystum á ykkar stuðning.

Mætum með alvöru norðlenska orku og skemmum okkur saman á pöllunum og munum að þetta verður að vera gaman.

Áfram Við