Íslensku landsliðsstelpurnar í Blomberg-Lippe í þýsku úrvalsdeildinni höfðu hægt um sig í níu marka sigri liðsins gegn Oldenburg. Blomberg Lippe vann leikinn 30-21 en liðið var fjórum mörkum yfir í hálfleik 16-12.

Engin af íslensku stelpunum skoruðu í leiknum en Díana Dögg Magnúsdóttir gaf tvær stoðsendingar. Þetta er í fyrsta skipti í vetur sem engin af þremur landsliðskonum Íslands skorar fyrir Blomberg-Lippe í deildarleik. En Auk Díönu leika Elín Rósa Magnúsdóttir og Andrea Jacobsen með liðinu sem er í 2.sæti deildarinnar.

Dortmund er á toppi deildarinnar þegar tvær umferðir eru eftir en einungis einu stigi munar á liðunum. Liðin mætast hinsvegar í lokaumferðinni og gera má ráð fyrir að úrslitin í deildinni ráðist í þeim leik. Blomberg-Lippe mætir Halle Neustadt í næstu umferð en liðið er í næsta neðsta sæti deildarinnar.

Á sama tíma mætir Dortmund liði Oldenburg áður en lokaumferðin fer síðan fram.