Færeyingar unnu Ítalíu með fjögurra marka mun 38-34 í síðari æfingaleik þjóðanna í Færeyjum í gærkvöldi fyrir framan þrjú þúsund áhorfendur í þjóðarhöllinni við Tjarnir í Þórshöfn í gær. Um var að ræða annan æfingaleik þjóðanna um helgina en Ítalía hafði betur í fyrri leiknum 36-34.

Stærstu tíðindi helgarinnar eru hinsvegar þau að Elias Ellefsen á Skipagøtu leikmaður Kiel í þýsku úrvalsdeildinni lék hvorugan leikinn vegna meiðsla sem hann hlaut fyrir áramót.

Elias var ekki í leikmannahópi þýska liðsins í þýsku úrvalsdeildinni er liðið mætti Magdeburg í toppslag deildarinnar fyrir áramót en hann meiddist á öxl í leik gegn Hannover- Burgdorf fyrir jól. Mikil óvissa ríkir yfir þátttöku Eliasar í fyrsta leik Færeyja á Evrópumótinu sem fram fer á föstudaginn er Færeyjar mæta Sviss.

Færeyjar eru í riðli með Sviss, Slóveníu og Svartfjallalandi en sá riðill er að mörgum talinn jafnasti riðill mótsins. Er því mikið í húfi fyrir Færeyinga í leiknum gegn Sviss í 1.umferðinni og það yrði mikið áfall fyrir þessa litlu þjóð ef þeirra langbesti leikmaður getur ekki spilað í leiknum gegn Sviss.