Samkvæmt áreiðanlegum heimildum Handkastsins bendir allt til þess að Kári Kristján Kristjánsson verði orðinn leikmaður nýliða Þórs í Olís-deildinni áður en langt um líður.

Handkastið greindi fyrst allra miðla frá því í síðustu viku að Kári Kristján ætti í viðræðum við Þór.

Í kjölfarið staðfesti Kári Kristján orðróminn í samtali við Handkastið og gerði ráð fyrir að ákvörðun myndi liggja fyrir, fyrir síðustu helgi. Nú er hinsvegar kominn miðvikudagur og samkvæmt heimildum Handkastsins er leikmaðurinn og félagið á loka metrunum að klára alla enda samningsins.

Kári Kristján sem er fertugur og verður 41 árs síðar á árinu mætti í ágúst í hlaðvarpið, Handkastið þar sem hann fór yfir tímalínu sumarsins í samningaviðræðum hans við uppeldisfélag sitt ÍBV. Á þeim tímapunkti var hann hræddur um að ferill sinn væri lokið en nú virðist allt benda til þess að hann taki síðasta dansinn með Þórsurum í Olís-deildinni.

Þór tekur á móti Val í 3.umferð deildarinnar næstkomandi föstudagskvöld en Kári lék með Val á sínum tíma.

Í 4.umferðinni fer síðan fram leikur ÍBV og Þórs í Vestmannaeyjum. Fyrstu leikir Kára með Þór gætu því verið gegn hans fyrrum félögum hér á landi en Kári hefur einnig leikið með Haukum hér á Íslandi.