Valur mætir hollensku meisturunum í JuRo Unirek í seinni leik liðanna í 1.umferð forkeppni Evrópudeildarinnar í N1-höllinni í dag klukkan 16:00. Sigurvegararnir úr einvíginu mæta Íslendingaliðinu Blomberg-Lippe í 2.umferð forkeppni Evrópudeildarinnar.

Valur er einu marki yfir í einvíginu eftir 31-30 sigur í Hollandi um síðustu helgi og standa því vel að vígi fyrir leikinn í dag.

Handkastið heyrði í Antoni Rúnarssyni í gær þar sem hann var nýbúinn á síðustu æfingu Vals fyrir leikinn í dag.

,,Við búumst við hörkuleik gegn hollensku meisturunum frá síðasta timabili. Við vorum í hörkuleik við þær um síðustu helgi í Hollandi þar sem við á endanum náðum að landa eins marks sigri eftir erfiða byrjun þar sem við lentum meðal annars 4-1 undir og vorum einu marki undir í hálfleik 15-16," sagði Anton sem sagði frábær karakter hjá liðinu hafi skilað því að liðið kom til baka við erfiðar aðstæður.

,,Við náðum að stilla okkur betur af í seinni hálfleik."

Anton gerir ráð fyrir hröðum og skemmtilegum leik í N1-höllinni í dag.

,,Þær keyra vel á þetta og eru með öflugar skyttur sem taka mikið til sín í leiknum. Það er mikið um innleysingar og klippingar í þeirra sóknarleik sem við munum þurfa glíma við. Þetta er spennandi verkefni og munum við leggja allt í sölurnar til þess að ná fram alvöru frammistöðu í þessum leik. Við höfum verið að vinna vel í okkar varnarleik síðustu daga ásamt sókninni sem mun vonandi skila sér í leiknum."

Anton hvetur alla áhugamenn um handbolta til að koma í N1-höllina í dag og styðja við bakið á Valsliðinu í Evrópukeppninni þar sem stuðningurinn skiptir gríðarlega miklu máli.

,,Hollenska liðið fékk góðan stuðning frá sínu fólki og viljum við hvetja alla til að mæta á leikinn og styðja okkur í þessari baráttu um að komast áfram í næstu umferð," sagði Anton Rúnarsson að lokum.

Áfram íslenskurhandbolti!