Haukar rassskeltu liði KA/Þórs í 11.umferð Olís-deildar kvenna í dag er liðin mættust á Ásvöllum. Haukar unnu fimmtán marka sigur, 35-20 en fyrir leikinn voru Haukar tveimur stigum á eftir KA/Þór í deildinni. Þetta verður því að teljast ansi óvænt úrslit út frá stöðu liðanna í deildinni fyrir leikinn.

Haukar gerðu sér lítið fyrir og skoruðu 24 mörk í fyrri hálfleik gegn tíu mörkum KA/Þórs.

Landsliðskonan, Rakel Oddný Guðmundsdóttir var markahæst í liði Hauka með ellefu mörk í leiknum og Jóhanna Margrét Sigurðardóttir kom næst með níu mörk. Sara Odden kom til baka í liði Hauka eftir meiðsli og skoraði átta mörk.

Susanne Pettersen og Tinna Valgerður Gísladóttir voru markahæstar í liði KA/Þórs með fimm mörk hvor. Bergrós Ásta Guðmundsdóttir skoraði fjögur mörk.

Sara Sif Helgadóttir í marki Hauka varði 15 skot í markinu en hún ásamt Rakel Oddný eru nýkomnar heim af heimsmeistaramótinu.

Sjáðu stöðuna í deildinni.