Leon Ljevar hefur þurft að yfirgefa æfingabúðir króatíska landsliðsins vegna meiðsla sem hann hlaut. Þetta staðfesti króatíska sambandið á samfélagsmiðlum sínum í dag.

Þar með er ljóst að Dagur Sigurðsson getur ekki notað Ljevar á Evrópumótinu sem framundan er en Leon Ljevar var í 22ja manna æfingahópi Dags fyrir Evrópumótið sem hefst í næstu viku.

Vinstri skyttan, Leon Ljevar sem er leikmaður Slovan í Slóveníu varð fyrir meiðslum á liðþófa og þarf að gangast undir aðgerð vegna meiðslanna. Gert er ráð fyrir að hann verði frá keppni næstu vikurnar og missi þar af leiðandi af Evrópumótinu.

Króatar eru í E-riðli með Georgíu, Hollandi og Svíþjóð og gætu mætt Íslandi komist báðar þjóðirnar áfram uppúr sínum riðli.