Íslensku landsliðsstelpurnar í Blomberg-Lippe unnu Neckarsulm með tveimur mörkum í 15.umferð þýsku úrvalsdeildarinnar í gærkvöldi, 29-27 eftir að hafa verið þremur mörkum yfir í hálfleik 16-13.

Þrátt fyrir að hafa verið með yfirhöndina allan leikinn náði Blomberg-Lippe aldrei að slíta sig almennilega frá Neckarsulm en mest náði Íslendingaliðið fjögurra marka forystu í leiknum.

Díana Dögg Magnúsdóttir skoraði fjögur mörk fyrir Blomberg-lippe og Andrea Jacobsen skoraði tvö mörk en hún gengur í raðir ÍBV næsta sumar. Elín Rósa Magnúsdóttir skoraði eitt mark í leiknum.

Blomberg-Lippe er eftir sigurinn áfram í 2. sæti deildarinnar með 26 stig jafnmörg stig og Borussia Dortmynd sem hafði betur gegn SV Union Halle-Neustadt 39-29 á útivelli í gærkvöldi. Dortmund á hinsvegar leik til góða á Blomberg-Lippe.