Eftir kærkomna endurkomu á völlinn aftur eftir meiðsli undanfarin ár hefur Darri Aronsson leikmaður Hauka ekki getað leikið með liðinu frá því í október í Olís-deild karla.

Darri meiddist á æfingu hjá Haukum í aðdraganda leiks Hauka gegn FH í lok október. Þar meiddist hann á liðþófa eftir að hafa fengið högg frá samherja á æfingunni. Í fyrstu var ákveðið að hvíla Darra frá æfingum og leikjum og vonast til að það myndi duga.

Það gerði það hinsvegar ekki og gekkst Darri undir smávægilega aðgerð á hné í byrjun janúar.

Darri sagði í samtali við Handkastið að endurhæfingin gengi vel. Hann vonast til að snúa aftur á völlinn í lok febrúar og sagði að það yrði frábært ef hann myndi ná að taka þátt í Final 4 bikarúrslitahelginni sem fer fram, lokahelgina í febrúar.

,,Eins og staðan er í dag þá er möguleiki að ég geti tekið þátt þá, en það er hinsvegar ennþá nægur tími og við verðum að bíða og sjá," sagði Darri í samtali við Handkastið.