Haukar og ÍR mætast í úrslitum Powerade-bikars karla í kvöld klukkan 18:30 á Ásvöllum. Haukar unnu FH í undanúrslitum á fimmtudagskvöldið á meðan ÍR vann KA með einu marki.

Liðin hafa mæst tvívegis í vetur og hefur Haukar haft betur í báðum leikjunum nokkuð sannfærandi. Haukar unnu fyrri leik liðanna 44-28 og þann seinni 39-31.

Handkastið hefur fengið nokkra spekinga til að spá í spilin fyrir leiki kvöldsins. 

Einar Jónsson - Þjálfari ríkjandi Íslands- og bikarmeistara Fram:
Haukar - ÍR 35 - 25

Því miður fyrir hlutlausa þá verður þetta frekar auðveldur leikur fyrir Hauka. Vona hins vegar að ÍR nái að gera leik úr þessu.

Ásbjörn Friðriksson - Fyrrum leikmaður FH:
Haukar - Valur 34 - 28

Reynslan í Haukaliðinu mun nýtast þeim vel í þessum leik og ef þeir ná fram sama varnarleik og markvörslu og í undanúrslitunum munu þeir vinna sannfærandi sigur. ÍR-ingar gerðu mjög vel á móti KA í undanúrslitunum, en það verður við ofurefli að etja í úrslitaleiknum.

Tandri Már Konráðsson - Leikmaður Stjörnunnar:
Haukar - ÍR 32 - 26

ÍR-ingar komu virkilega á óvart í leiknum gegn KA. Þetta var einn af þessum leikjum þar sem allt gekk upp, bæði sóknar- og varnarlega. Ég spái því þó að Haukar verði of stór biti fyrir ÍR-inga. Haukarnir litu mjög vel út varnarlega og ef þeir ná upp sömu stemningu og ákefð og í leiknum gegn FH spái ég því að þeir vinni þennan leik nokkuð örugglega.

Halldór Jóhann Sigfússon - Þjálfari HK:
Haukar - ÍR 33 - 30

Spáin er 33-30 fyrir Hauka eftir hörku leik. Þetta verður mjög hraður leikur en bæði lið eru góð að keyra á hröðum upphlaupum. Vonandi ná ÍR ingar að halda töpuðum boltum í lágmarki en ef það gerist ekki þá gæti þetta orðið erfitt fyrir þá. Haukarnir virkuðu mjög þéttir á móti FH og eru sigurstranglegri fyrirfram en allt getur gerst í bikarnum og hver leikur á sitt líf.

Styrmir Sigurðsson - Handkastið:
Haukar - ÍR 35 - 27

ÍR kom öllum a óvart með að komast í bikarúrslitin og það mestmegnis án Baldurs Fritz. Ef satt reynist sem Bjarni sagði að hann reiknaði ekki með Baldri í úrslitaleiknum þá verður þetta erfitt verkefni. Haukar á heimavelli og þyrstir í titil og þekkja hverja fjöl á Ásvöllum og eru með klefann líka. Óttast að ÍR verði saddir þegar leikurinn byrjar og sáttir með silfrið.