Það er ótrúleg saga línumannsins Arnórs Róbertssonar en eftir tímabilið 2023/2024 var samningi hans við HK sagt upp og stóð hann uppi sem félagslaus. Arnór dó ekki ráðalaus og ákvað að semja við Hauka og leika með B-liði félagsins í Grill66-deildinni.

Arnór hafði nú ekki verið í stóru hlutverki hjá HK, lék hann tíu leiki með liðinu í Olís-deildinni 2023/2024 og skoraði hann þrjú mörk. Þjálfarabreytingar urðu á HK-liðinu, Sebastian Alexandersson fékk ekki áframhaldandi samning og Halldór Jóhann Sigfússon tók við liðinu.

Með Haukum 2 í Grill66-deildinni á síðustu leiktíð lék hann hinsvegar alla 16 leiki liðsins og skoraði 36 mörk.

Nú er staðan hinsvegar orðin önnur. Í dag er Arnór orðinn byrjunarliðsleikmaður hjá Haukum í Olís-deild karla og varð á laugardaginnn bikarmeistari með liðinu eftir sjö marka sigur á ÍR, 28-21. Í þeim leik skoraði Arnór eitt mark.

Handkastið tók viðtal við Arnór eftir sigurinn á laugardaginn. Þar var hann spurður að því hvort honum hafi dottið það í hug þegar hann gekk í raðir Hauka fyrir síðasta tímabil til að leika með B-liði félagsins að rúmlega ári síðar yrði hann byrjunarliðsmaður í bikarúrslitaleik með aðalliði félagsins og vinna bikarmeistaratitilinn?

,,Nei ég gerði ekki ráð fyrir því. Maður reynir að gera sitt besta og það er gaman að vera kominn í byrjunarliðið og verða bikarmeistari."

En hvernig kemur það til að Arnór kemur óvænt inn í aðallið Hauka á þessu tímabili?

,,Samningi mínum var sagt upp hjá HK og ég spilaði með B-liðinu hjá Haukum í fyrra og var að spila með B-liðinu í upphafi tímabils. Síðan komu upp meiðsli hjá aðalliðinu og ég fékk að fá að æfa með þeim og síðan er ég kominn í byrjunarliðið núna. Ég kom í rauninni bara til að leika mér og halda mér í standi en nú er maður kominn aðeins lengra en það. Æfingatímarnir breytast og maður leggur meiri áherslu á líkamlega hlutann og allt í kringum vinnuna, hvernig maður skipuleggur sig. Æfingatímarnir eru þægilegri og allt töluvert þægilegra," sagði Arnór sem hefur verið í byrjunarliði Hauka í undanförnum leikjum en fyrsti byrjunarliðsleikurinn var gegn Stjörnunni í febrúar.

En hvernig er að standa uppi sem bikarmeistari?

,,Þetta er frábært. Þetta verður ekki betra en það."

Verður hann áfram hjá Haukum á næstu leiktíð?

,,Ég hef ekki hugmynd. Við vorum bara að klára þetta verkefni og síðan skoðum við, hvað kemur næst," sagði Arnór í samtali við Handkastið eftir leik á laugardaginn en Arnór er sonur fyrrum landsliðslínumannsins, Róberts Sighvatssonar.