Moldóvinn, Igor Chiseliov verður ekki áfram í herbúðum Þórs í Olís-deild karla á næstu leiktíð. Þetta staðfesti Jason Orri Geirsson fyrirmaður handknattleiksmála hjá Þór í samtali við Handkastið.

Samningur Igors rennur út í sumar og er það orðið ljóst að Þórsarar ætla ekki að framlengja við hann.

Igor gekk í raðir Þórs í upphafi tímabils eftir að hafa leikið víða um heim undanfarin ár. Hann lék 21 leik með Þór í Olís-deildinni í vetur og skoraði 29 mörk.

Óhætt er að segja að Igor hafi ekki staðið undir þeim væntingum sem Þórsarar höfðu til hans og var hann í vetur í litlu sem engu hlutverki í liðinu. Var það meðal annars rætt í Handkastinu í desember hvort Igor myndi mæta aftur eftir áramót sem hann þó gerði.

Þórsarar sömdu á dögunum við danska leikstjórnandann, Bertram Simonsen fyrir næsta tímabil.