Þýska handknattleiksfélagið SC DHfK Leipzig hefur framlengt samning sinn við slóvenska leikstjórnandann Dean Bombač. Nýi samningurinn bindur Bombač við félagið til ársins 2027. 

Bombač, sem gekk til liðs við Leipzig í upphafi tímabilsins hefur reynst mikilvægur hlekkur í sóknarleik liðsins. Hefur Slóveninn komið með dýrmæta reynslu inn í hópinn við erfiðar aðstæður en liðið situr á botni þýsku úrvalsdeildarinnar.

Í tilkynningu félagsins kemur fram að mikil ánægja ríkir með framlag hans og líti á hann sem lykilmann í áframhaldandi uppbyggingu liðsins en tekið er fram að Bombač verði áfram í Leipzig þó svo að það verði örlög félagsins að leika í þýsku B-deildinni á næstu leiktíð.

Sjálfur hefur Bombač einnig lýst ánægju sinni með að halda áfram hjá félaginu og segir að hann finni sig vel innan liðsins og í borginni.

Blær Hinriksson leikur með Leipzig en hann gerði eins árs samning við félagið síðasta sumar. Ekki er vitað hvað tekur við hjá Blæ eftir tímabilið.