Víkingur sem leikur í Grill66-deildinni hefur samið við Ísak Óla Eggertsson, öflugan leikstjórnanda,
um að ganga til liðs við félagið fyrir komandi tímabil. Ísak Óli gengur í raðir Víkings frá Haukum en hann lék með Haukum 2 í Grill66-deildinni á síðustu leiktíð.

,,Ísak Óli er uppalinn í KA á Akureyri, kemur til Víkings frá Haukum í Hafnarfirði. Hann býr yfir mikilli
reynslu og leikskilningi, og mun styrkja lið Víkings verulega í baráttunni í Grill-66 deildinni. Ísak er gríðarlega efnilegur leikstjórnandi með mikinn skilning á leiknum, býr yfir mikilli tækni og er góður stjórnandi," segir í tilkynningu Víkings á samfélagsmiðlum sínum í dag.

„Við erum gríðarlega ánægðir með að fá Ísak Óla í hópinn okkar. Hann er
hugmyndaríkur leikstjórnandi með mikla sýn á leikinn, og hefur sýnt það bæði hjá KA og
annars staðar að hann er klár í að stýra sóknarleik liðsins. Þetta er mikilvæg viðbót við
hópinn okkar sem við teljum geta gert okkur kleift að stíga næsta skref,“ segir Aðalsteinn Eyjólfsson, þjálfari og yfirmaður handknattleiksmála hjá Víkingi.

Ísak sjálfur er spenntur fyrir nýju verkefni. „Það er virkilega spennandi að ganga til liðs við Víking. Ég sé mikla möguleika í þessu liði og það er greinilegt að verið er að byggja hér upp af metnaði. Ég hlakka til að leggja mitt af mörkum og taka þátt í þessu verkefni með flottum hópi leikmanna og þjálfara.“