Hrannar Ingi Jóhannsson sem leikið hefur með ÍR undanfarin ár er samningslaus félaginu. Hann gæti verið á förum frá félaginu en hann er í viðræðum við nýliða Þórs frá Akureyri samkvæmt heimildum Handkastsins.

Hrannar Ingi er þessa dagana á reynslu fyrir norðan þar sem hann æfir með Þór áður en ákvörðun verður tekin með framhaldið.

Þórsarar hafa verið rólegir á leikmannamarkaðnum eftir að þeir tryggðu sér sæti í Olís-deildinni eftir sigur í Grill66-deildinni á síðustu leiktíð.

Hrannar skoraði 45 mörk í 18 leikjum með ÍR í Olís-deildinni á síðustu leiktíð en hann var að ljúka sínu fimmta tímabili með ÍR.