4.flokkur karla hjá HK kom sá og sigraði Generation Handball mótið sem fram fer árlega í Viborg í Danmörku. Fór mótið fram í síðustu viku og lauk á föstudaginn síðastliðinn.

HK handbolti á samfélagsmiðlum greinir frá þessu en þar segir að HK hafi sent þrjú lið á mótið og kom heim með eitt gull og tvö silfur.

,,Sterkt mót þar sem umgjörð, dómgæsla og allt var með besta móti. Stórt hrós til mótshaldara," segir í tilkynningunni frá HK.

2010 árgangurinn vann alla leiki sína á mótinu og stóð sanngjarnt uppi sem sigurvegari mótsins.

HK sendi tvö lið til keppni í 2009 árgangnum. HK 1 unnu alla leiki sína á mótinu fram að úrslitaleik þar sem þeir töpuðu gegn sterku liði Karabatic Camp sem þeir unnu fyrr í mótinu. HK 2 töpuðu einnig úrslitaleiknum í B-úrslitum.

Þjálfari liðsins er Davíð Elí Heimisson.