Evrópska handknattleikssambandið, EHF íhugar það nú alvarlega að fjölga keppnisliðum í Meistaradeild Evrópu úr 16 í 20 eða 24 félög fyrir tímabilið 2026/2027. Þetta herma heimildir Handkastsins.

Mótafyrirkomulagið í Meistaradeild Evrópu er þannig að leikið er í tveimur átta liða riðlum þar sem hvert félag leikur alls fjórtán leiki. Sex lið fara áfram úr riðlakeppninni í útsláttarkeppni sem endar síðan með algjörri handboltaveislu í Köln um miðjan júní mánuð þar sem fjögur sterkustu lið keppninnar mætast í undanúrslitum og loks úrslitum.

Nú veltir EHF hinsvegar fyrir sér að breyta fyrirkomulaginu en samkvæmt heimildum Handkastsins eru sjónvarpsrétthafar keppninnar ekki ánægðir með þróun keppninnar og áhugann á riðlakeppninni en þar eru margir leikir leiknir og margir hverjir með litla þýðingu þar sem mörg af bestu félögum keppninnar komast auðveldlega í gegnum riðlakeppnina og í útsláttarkeppnina.

Þrjár sviðsmyndir hafa verið settar upp í umræðunni um það hvernig EHF sér fyrir sér að breyta keppnisfyrirkomulaginu.

Tillaga 1:
- Halda áfram með 16 félög en leikið verði í fjórum fjögurra liða riðlum.

Tillaga 2:
- Fjölga í 20 félög með tveimur tíu liða riðlum eða fimm riðlum með fjórum liðum.

Tillaga 3:
- Fjölga í 24 félög með sex fjögurra liða riðlum.

Það verður athyglisvert að sjá hvað EHF ákveður að gera en óánægja hefur verið með núverandi mótafyrirkomulag og eins hafa félög sem ekki hafa fengið svokallað "Wild-card" verið óánægð með gagnsæið hjá EHF en yfirleitt eru sömu félögin valin aftur og aftur og lítil endurnýjun í keppninni ár frá ári.