Danski línumaðurinn Lukas Jørgensen er sannfærður um að Veszprém hafi burði til að stíga næsta skref í Meistaradeild Evrópu á komandi tímabili.

Jørgensen gekk í sumar til liðs við ungverska stórliðið frá Flensburg-Handewitt í sumar. Hann er hinsvegar meiddur og verður frá keppni í upphafi tímabils.

Gengi Veszprém í Meistaradeild Evrópu hafa ollið vonbrigðum en liðið hefur ekki komist í Final 4 helgina í Köln síðan árið 2022 en þá endaði liðið í 4.sæti keppninnar.

„Þetta hefur verið mjög góð byrjun. Leikmennirnir og allt starfsfólkið hjá félaginu hafa tekið mjög vel á móti mér og hjálpað bæði mér og kærustunni minni að koma okkur fyrir í Veszprém,“ sagði Jørgensen í samtali við Nemzeti Sport.

Kröfurnar eru miklar í Veszprém. Félagið ætlar sér að vinna titla innanlands og gera atlögu að toppsætum í Meistaradeildinni.

„Mér finnst alltaf auðvelt að tala um markmiðin hjá félagi sem þessu, því þau eru þau sömu á hverju ári. Veszprém er að mínu mati stærsta félagið í Ungverjalandi og það þurfum við að sýna aftur í ár.“

Jørgensen telur að Veszprém geti einnig látið verulega að sér kveða í Meistaradeildinni.

„Það eru mörg góð lið í Meistaradeildinni, en ég hef virkilega á tilfinningunni að þetta félag og þetta lið geti tekið næsta skref á þessu tímabili. Það er löng leið í að komast í átta liða úrslitin og enn lengra eftir það, þannig að fyrst og fremst þurfum við að leggja hart að okkur. En mér finnst við hafa leikmennina til þess.“