Alfreð Gíslason, landsliðsþjálfari Þýskalands, var ánægður með frammistöðu sinna manna eftir tvo örugga sigra í undankeppni Evrópumótsins. Þjóðverjar unnu Belgíu 42-32 og Slóvakíu 39-27 en Alfreð segir leikina hafa gefið sér mikilvægar upplýsingar fyrir valið á landsliðshópnum fyrir heimsmeistaramótið sem fram fer í Þýskalandi í janúar.

„Allir fengu að spila og allir stóðu sig vel,“ sagði Alfreð Gíslason eftir sigurinn gegn Slóvakíu á sunnudagskvöldið.

Alfreð viðurkenndi að hann hefði fengið nýja innsýn í stöðu leikmannahópsins eftir leikina tvo en vildi ekki fara nánar út í hvaða leikmenn hefðu styrkt stöðu sína í baráttunni um sæti í HM-hópnum.

Fram undan eru mikilvægar vikur hjá þýsku landsliðsmönnunum sem þurfa nú að sanna sig með félagsliðum sínum.

„Við sjáum hvernig leikmennirnir standa sig með sínum félagsliðum,“ sagði Alfreð.

Á næstu dögum mun hann tilkynna 35 manna hóp en gert er ráð fyrir að endanlegt val fyrir heimsmeistaramótið verði kynnt 14. desember.

Þrátt fyrir að nokkrar erfiðar ákvarðanir séu fram undan er staðan á leikmannahópnum góð rúmum tveimur mánuðum fyrir mótið.

Þjóðverjar léku án Juri Knorr, sem var frá vegna veikinda, í sigrinum gegn Slóvakíu en það kom ekki að sök.

Alfreð var sérstaklega ánægður með frammistöðu liðsins í fyrri hálfleik.

„Ég var mjög ánægður, sérstaklega með varnarleikinn í fyrri hálfleik,“ sagði Alfreð.

Hann hrósaði einnig hraðanum í sóknarleiknum og sagði hvernig liðið nýtti seinni bylgjuna og hraðaupphlaupin í fyrri hálfleik hafa verið stórkostlegt.

Stærstur hluti HM-hópsins virðist vera að mótast en enn ríkir óvissa um hvaða leikmenn verða valdir í hægri skyttustöðuna og á vinstri kantinn.

Á vinstri kantinum berjast meðal annars Lukas Mertens og Rune Dahmke um sæti í hópnum.

Þá fengu David Móré og Tim Freihöfer tækifæri í leikjum undankeppninnar. Móré skoraði sex mörk úr sex skotum en Freihöfer þrjú mörk úr fjórum skotum.

Alfreð vildi ekki gefa neitt upp um stöðu leikmannanna.

„Við erum með breiðan hóp þar sem allir eiga möguleika á að komast inn,“ sagði hann.

Johannes Golla, fyrirliði Þýskalands, tók undir jákvæða upplifun þjálfarans eftir síðustu landsliðsviku ársins 2026.

Hann talaði um góða viku og framfarir hjá liðinu en lagði jafnframt áherslu á að Þjóðverjar þyrftu að bæta sig enn frekar fyrir heimsmeistaramótið.

„Ef við ætlum að ná þeim háu markmiðum sem við höfum sett okkur þurfum við allir að bæta okkur um eitt þrep,“ sagði Golla.