Skarphéðinn Ívar Einarsson leikmaður Hauka í Olís-deild karla varð fyrir því óláni að nefbrotna í tapi liðsins gegn Aftureldingu á fimmtudagskvöldið.

Gunnar Magnússon þjálfari Hauka staðfesti tíðindin við Handkastið en Haukar mæta uppeldisfélagi Skarphéðins, KA á heimavelli í næstu umferð á miðvikudagskvöldið.

Gunnar sagðist ekki vita á þessari stundu hversu lengi Skarphéðinn yrði frá og hvort hann gæti á einhverjum tímapunkti leikið með andlitsgrímu.

Skarphéðinn nefbrotnaði snemma leiks í níu marka tapi Hauka gegn Aftureldingu en hann hafði skorað eitt mark í leiknum fyrir atvikið. Ævar Smári Gunnarsson hægri skytta Aftureldingar gaf Skarphéðni olnbogaskot í þann mund sem hann var að prjóna sig framhjá honum sóknarlega með þeim afleiðingum og Skarphéðinn nefbrotnaði.

Um er að ræða gríðarlegt högg fyrir Hauka missi Skarphéðinn af næstu leikjum Hauka en Haukar sem eru á toppi deildarinnar mæta KA, ÍR og Fram fyrir jól auk þess að spila í 8-liða úrslitum Powerade-bikarsins í lokaleik sínum fyrir jól.