Karlalið Vals tekur þátt í afar sterku alþjóðlegu móti í Þórshöfn í Færeyjum næsta sumar en það er Handbolti.is sem greindi fyrst frá þessu hér á Íslandi en það er færeyski fréttamiðilinn in.fo sem segir frá mótinu.

Mótið fer fram dagana 13. - 16. ágúst og verður hluti af undirbúningi Vals fyrir Olís-deildina á næstu leiktíð. Fjögur lið taka þátt á mótinu en auk Vals verður færeyska lið H71, þýska stórliðið Kiel og danska stórliðið, GOG. GOG leikur í Meistaradeildinni á þessu tímabili.

Leikir mótsins fara fram í þjóðahöllinni í Færeyjum, við Tjarnir. Á vef in.fo segir að mótið verði það stærsta sem fram hefur farið á vettvangi félagsliða í Færeyjum.

Mikil færeysk tenging er við öll erlendu félögin sem taka þátt í mótinu. Með liði Vals leika færeysku landsliðsmennirnir, Allan Norðberg og Bjarni í Selvindi auk þess sem þjálfari Vals, Ágúst Þór Jóhannsson þjálfaði færeyska kvennalandsliðið um tíma.

Elias Ellefsen á Skipagøtu er leikmaður THW Kiel í þýsku úrvalsdeildinni og frændi hans, Óli Mittún, er lykilmaður í liði GOG í Danmörku en liðið er í 2.sæti dönsku úrvalsdeildarinnar á eftir Álaborg. H71 er í efsta sæti færeysku úrvalsdeildarinnar um þessar mundir og leikur við Kyndil í úrslitum bikarkeppninnar á laugardaginn.