Ágústa Rún Jónasdóttir línumaður Vals í Olís-deild kvenna verður frá keppni næstu 4-6 vikurnar. Þetta staðfesti Anton Rúnarsson í samtali við Handkastið.

Ágústa Rún fingurbrotnaði í síðasta leik Vals í Olís-deild kvenna þegar liðið vann tíu marka sigur á Stjörnunni. Ágústa skoraði þrjú mörk úr þremur skotum í sigrinum gegn Stjörnunni en eftir frekari skoðun kom í ljós eftir leikinn að hún hafi brotnað á vísifingri.

Ágústa lék því ekki með Val í undanúrslitum bikarsins gegn KA/Þór á fimmtudaginn og verður ekki með liðinu í dag gegn Haukum í úrslitaleik Powerade-bikarsins sem hefst klukkan 15:30.

Það er einnig ljóst að Ágústa spilar ekkert meira með Val í Olís-deildinni en þrjár umferðir eru eftir af deildinni áður en úrslitakeppnin hefst.